विप्लव समूहको नाममा व्यवसायीहरूलाई धम्क्याएर करोडाैँ असुल्न खाेज्ने ४ जना प्रहरी फन्दामा

काठमाडाैँ,काठमाडौंका व्यवसायीहरूलाई विप्लव समूहको नाममा धम्क्याएर तीन करोड माग्ने चार जना पक्राउ परेका छन्। महानगरीय अपराध महाशाखाको टोलीले उपत्यकाको विभिन्न स्थानबाट उनीहरूलाई पक्राउ गरेको हो।

पक्राउ पर्नेमा नुवाकोटका ३३ वर्षीय बिन्तोष सिलवाल ( सुनार ), रामेछापका ३१ वर्षीय रामदल श्रेष्ठ, काभ्रेका ५२ वर्षीय तिर्थमान तामाङ र चितवनका ४२ वर्षीय नन्दुराज आचार्य छन्। उनीहरूलाई महाशाखाको टोलीले सोमबार नै पक्राउ गरेको महाशाखा प्रमुख एसएसपी दीपक थापाले जानकारी दिनुभयाे ।

एसएसपी थापाका अनुसार  उनीहरूले काठमाडौं उपत्यका लगायतका विभिन्न स्थानका व्यवसायीहरूलाई फोन गरी धम्क्याउँथे। उनीहरूले आफूहरू नेकपा माओवादी, विप्लव समूहका पूर्व जिल्ला सेक्रेटरी र कार्यकर्ता हौं भनेर चिनाउँथे। त्यसरी चिनाएपछि उनीहरूले तीन करोड चन्दा माग गर्ने गरेको र नदिएमा भौतिक कारबाहीको धम्की समेत दिने गरेका थिए ।

त्यस्तै उनीहरूले व्यवसायीहरू कार्यरत कार्यालय र बसोबास गर्ने स्थानको निगरानी गरी जबरजस्ती रकम समेत माग गरेको भन्ने महाशाखामा सूचना पाएको थियो। त्यही अनुसार महाशाखाको टोलीले उनीहरूको खोजी गरी पक्राउ गरेको हो।

उनीहरूविरूद्ध आपराधिक लाभ लिन नहुने कसुरमा मुद्दा दर्ता गरिएको छ। थप अनुसन्धान गर्न काठमाडौं जिल्ला अदालतबाट तीन दिन हिरासतमा राख्न अनुमति समेत प्राप्त भइसकेको महाशाखाले जनाएको छ।