डाेल्पा,नेकपा एमालेकाे जिल्ला अधिवेशन आजबाट ६१ जिल्लामा शुरू हुँदै छ । डोल्पामा पनि अधिवेशनकाे तयारी भव्यरूपमा भइरहेकाे छ । जिल्लाकाे पार्टी अध्यक्षका लागि ५ जनाले दावेदारी प्रस्तुत गरेका छन् । जिल्लाका एक नेताका अनुसार अध्यक्ष पदका लागि शेरबहादुर बुढा,विष्णु रोकाया,नरबहादुर बुढा, लंक शाही र तुलाचन्द्र बुढा दाबी गरेका छन् । सचिव पदका लागि भने लंक राेकायाले हालसम्म दावी प्रस्तुत गरेका छन् । उपाध्यक्षमा दावी प्रस्तुत गर्ने भने हालसम्म नखुलेकाे बताइएकाे छ ।
सर्वसम्मत रुपमा अध्यक्ष सहित पदाधिकारी चयन गर्ने प्रयास भने जारी रहेको जिल्ला एमालेका एक नेताले जानकारी दिए । ती नेताका अनुसार चुनाव भएको खण्डमा शेरबहादुर बुढा जित्ने करिब निश्चित छ तर पार्टीलाई एकताको अधिवेशनका रुपमा लिइएका कारण अध्यक्षका आकांक्षीहरुलाई मिलाएर लैजाने तयारी भएको छ ।
‘हामी सर्वसम्मत रुपमा नेतृत्व चयन गर्छौं । पार्टीलाई एकताको अधिवेशनको रुपमा अघि बढाउँदै सक्षम र सबल नेतृत्व दिलाउँछौं,’ एमाले डोल्पा इन्चार्ज बद्यमीक्वारी बोहोराले भनिन्, ‘त्यसका लागि प्रयास जारी राखेका छौं । सबै कामरेडलाई मिलाउँदै पार्टीलाई एक ढिक्का बनाउन हामी जुटेका छौं ।’ सबैको ध्यान डोल्पाको अध्यक्षमा रहेका कारण अन्य पदका लागि भने उम्मेदवारी कसैले पनि घोषणा गरेका छैनन् ।