काठमाडौं, संघीय संसद्को सभामुख र उपसभामुखको चुनाव आगामी माघ ९ गतेभित्र गर्ने विषयमा दलहरू सहमतिमा पुगेका छन्। संसदमा प्रतिनिधित्व गर्ने राजनीतिक दलहरूबीच माघ ९ गतेभित्र सभामुख र उपसभामुखको चुनाव गर्न सहमति भएको हो।
कांग्रेसका मुख्य सचेतक रमेश लेखकले माघ ९ भित्र सभामुख र उपसभामुख चयन गर्न सर्वदलीय बैठकमा लगभग सहमति जुटेको बताए। लेखकले माघ ७ गते सभामुख र माघ ९ गते उपसभामुखको चुनाव गर्ने विषयमा सहमति जुटेको बताए।
संसदको पहिलो बैठक बसेको १५ दिनभित्र सभामुख र उपसभामुख चयन गरिसक्नुपर्ने संवैधानिक व्यवस्था छ। प्रतिनिधि सभाको पहिलो बैठक पुस २५ मा बोलाइएको छ। बैठकमा शीर्ष नेताले सम्बोधन गर्ने कार्यसूची छ।
