spot_img

तिहारको चौँथो दिनःआज गोवर्द्धन पूजाःनेवार समुदायले मनाए म्हः पूजा पनि आजै

spot_img

काठमाडौँ,यमपञ्चक अर्थात् तिहारको चौँथो दिन आज गोवद्र्धन पर्वत, बली, गोरु र हलिको पूजा आजा गरी मीठो खानेकुरा खान दिएर मनाइँदैछ । कार्तिक शुक्ल प्रतिपदाका दिन गोवद्र्धन पर्वत, बली, गोरु र हलिको पूजा आजा गरी सम्मान प्रकट गर्ने गरिन्छ । आजका दिनमा घर आँगनमा लिपपोत गरी गाईको गोबरको पर्वत बनाई त्यसलाई गोवद्र्धन पर्वत मानी पूजा गरिन्छ ।

द्वापर युगमा भगवान् श्रीकृष्णले हत्केलाले गोवद्र्धन पर्वत उचाली गोकुलवासीलाई मुसलधारे वर्षाबाट बचाएको सम्झनामा गोवद्र्धन पर्वतको पूजा गर्ने प्रचलन बसेको धर्मशास्त्रविद् प्रा डा देवमणि भट्टराई बताउछन् । गोवद्र्धन पूजा प्रतिपदाका दिन सूर्योदय भएका दिन गर्नुपर्ने विधि रहेको नेपाल पञ्चाङ्ग निर्णायक विकास समितिका अध्यक्ष प्रा श्रीकृष्ण अधिकारीले बताए ।

नेवार समुदायले मनाए म्हः पूजा
समुदायले आज म्हः पूजा मनाएका छन् । यो समदायले भोलि मङ्गलबार किजा पूजा अर्थात् भाइटीका मनाउने भएका छन् ।पञ्चाङ्ग निर्णयक समितिले निर्धारण गरेको मितिभन्दा एक दिन अगाडि नै यहाँका नेवार समुदायले म्हः पूजा मनाएको र भाइटीका पनि सोहीअनुसार मनाउने भएका हुन् । नेपाल संवत्को नयाँ वर्षका दिन मनाइने न्हुँ दया भिन्तुना र्यालीसमेत यहाँका नेवार समुदायले आजै मनाएका छन् । भक्तपुरका विभिन्न ठाउँबाट भिन्तुना र्याली आयोजना गरेका थिए ।

तिहार (स्वन्ती) मनाउने विषयमा भक्तपुर नगरपालिकाले ज्योतिष डा वीरेन्द्रप्रसाद कायष्थ एवं ज्योतिष केदारप्रसाद दैवज्ञ, तलेजुका पुजारीहरू प्रजेशराज राजोपाध्याय, महेश कर्माचार्य, पदमलोचन कर्माचार्यसहितको छलफलपछि आज म्हः पूजा र भोलि २८ गते भाइटीका लगाउने निर्णय सार्वजनिक गरेपछि यहाँका समुदायले सोही अनुसार पर्व मनाएका हुन् ।

पञ्चाङ्ग निर्णायक समिति आज २७ गते गाई तिहार, २८ गते गोवद्र्धन तथा म्ह पूजा र २९ गते भाइटीका एवं किजा पूजा गर्ने निर्णय गरे पनि भक्तपुरमा भने एक दिनअगाडि नै यो पर्व मनाएका हुन् । भक्तपुर नगरपालिकाले भने २६ गते अपराह्न २ बजेर १४ मिनेटपछि औँसी तिथि लाग्ने हुँदा उक्त दिन साँझ लक्ष्मीपूजा गर्ने, कात्तिक २७ गते अपराह्न २ बजेर ४१ मिनेटपछि परेवा प्रतिपदा तिथि सुरु हुने भएकाले त्यस दिन साँझ म्हः पूजा गर्ने र कात्तिक २८ गते अपराह्न २ बजेर ३८ मिनेटमा द्वितीया तिथि लाग्ने भएकाले सो दिन किजा पूजा अर्थात् भाइटीका गरेर तिहार सम्पन्न गर्न आह्वान गरेअनुसार यो पर्व मनाउन लागिएको हो ।

म्हः अर्थात् आफ्नो शरीरलाई परमात्मा मानेर आफूले आफैँलाई पूजा गरी सु–स्वास्थ्य तथा दीर्घायुको कामना गरी आफ्नो आत्मालाई चिनेर आत्मशुद्धि गरी ज्ञानको ज्योति फलाउने कामनासहित म्हः पूजा मनाउने गरिन्छ । म्हः पूजा साँझ घरका सबै सदस्य एकै ठाउँमा लामबद्ध बसेर आफैँले आफ्नो पूजा गर्ने परम्परा छ । ठूला दैवी प्रकोपबाट आफूले आफैँलाई बचाउने शक्ति प्राप्त गर्न पनि म्हः पूजा गर्ने परम्परा रहेको बताइन्छ ।

spot_img
- Advertisement -spot_img

LEAVE A REPLY

Please enter your comment!
Please enter your name here

- Advertisement -spot_img
spot_img

भर्खरै

- Advertisement -spot_img

यो पनि पढौँ

- Advertisement -spot_img