डाेल्पाबाट अख्तियारमा उजुरीका चाङःस्थानीयतहका सबैभन्दा धेरै,कुन स्थानीयतहबाट कति उजुरी परे? के गर्दैछ अख्तियार ?

“डाेल्पाबाट विगतमा  ४१ वटा उजुरी अख्तियारमा दर्ता भएकाेमा पछिल्लाे ७ महिना भित्रमात्रै  ५१ वटा उजुरी दर्ता”

रूपक कुलाल,काठमाडाैँ

अख्तियार दुरुपयोग अनुसन्धान आयोगकाे कार्यालय सुर्खेतमा डाेल्पा जिल्लाबाट ९३ वटा उजुरी दर्ता भएका छन्। जसमध्धे २० वटा फर्छ्याैट भइसकेका छन्। भने ७३ वटा मुद्दा अनुसन्धानकै क्रममा छन्। डाेल्पाबाट हालसम्म ९३ वटा उजुरी दर्ता भएकोअख्तियारले जनाएको छ । ७१ स्थानीयतहहरूका र २२ वटा अन्य कार्यालयहरूका मुद्दा दर्ता भएका छन्। चालु आर्थिक वर्षको ७ महिनाको अवधिमा ५१ वटा मुद्दा दर्ता भएका छन्।

७३ उजुरीकाे अनुसन्धान जारी रहेकाे आयोगका सूचना अधिकारी रत्‍नचन्द्र गौतमले जानकारी दिनुभयाे। सुचना अधिकारी गाैतमका अनुसार पछिल्लाे समय डाेल्पाबाट सबै भन्दा धेरै स्थानीयतहहरूका उजुरी धेरै परेका छन्। उनले थपे “स्थानीयतहका मात्रै कुल ९३ मध्धे ७१ वटा उजुरी अख्तियारमा परेका छन्। कराेडाैँका ठुला याेजनाहरूका मुद्दाकाे संख्या पनि पर्ने गरेकाे र उजुरी दर्ताकाे संख्या बढ्दाे रहेकाे छ।”

अख्तियारकाे तथ्याङ्कलाइ आधार मान्ने हाे भने स्थानीयतहहरूलाइ हेर्दा सबै भन्दा धेरै शे-फाेक्सुण्डाे गाउँपालिकाका मुद्दा दर्ता भएका छन्। पुराना ३ र चालु आर्थिक वर्षको ७ महिनाको अवधिमा मात्रै ११ वटा गरि १४ मुद्दा दर्ता भएका छन्। पछिल्लाे ७ महिनाकाे उजुरी संख्या पनि जिल्लाका अन्य स्थानीय तहहरूकाे तुलनामा सबैभन्दा धेरै हाे।

यस्तै दाेस्राे स्थानमा ठुलीभेरी नगरपालिकाका उजुरी दर्ता भएका छन्। पुराना ८ र चालु आर्थिक वर्षको ७ महिनाको अवधिमा मात्रै ५ गरि १३ वटा मुद्दा दर्ता भएका छन्। १ वटा उजुरी मात्र फर्छ्याैट भएकाेमा त्यहिं मुद्दा विशेष अदालतमा दर्ता भएकाे थियाे। १२ वटा मुद्दा अनुसन्धानकै क्रममा रहेकाे अख्तियारले जनाएकाे छ।

यस्तै तेस्राे स्थानमा मुड्केचुला गाउँपालिकाका उजुरी दर्ता भएका छन्। पुराना ६ र चालु आर्थिक वर्षको ७ महिनाको अवधिमा मात्रै ६ गरि १२ वटा मुद्दा दर्ता भएका छन्। ३ वटा उजुरी मात्र फर्छ्याैट भएका छन्,१ वटा मुद्दा विशेष अदालतमा दर्ता भएकाे छ। ९ वटा मुद्दा अनुसन्धानकै क्रममा रहेकाे अख्तियारले जनाएकाे छ।

यस्तै चाैंथाे स्थानमा त्रिपुरासुन्दरी नगरपालिकाका उजुरी दर्ता भएका छन्। पुराना १० र चालु आर्थिक वर्षको ७ महिनाको अवधिमा मात्रै १ गरि ११ वटा मात्र मुद्दा दर्ता भएकाे छ। १ उजुी  मात्र फर्छ्याैट भएकाे छ। १० वटा मुद्दा अनुसन्धानकै क्रममा रहेकाे अख्तियारले जनाएकाे छ।

पाचाैँ स्थानमा जगदुल्ला गाउँपालिका उजुरी दर्ता भएका छन्। पुराना १ र नयाँ ९ वटा गरेर कुल १० वटा उजुरी दर्ता भएका छन्। जसमध्धे ३ वटा फर्छ्याैट भएकाे ७ मुद्दा अनुसन्धानकै क्रममा रहेका छन्।

छैटाैँ स्थानमा छार्काताङसाेङ गाउँपालिकाका मुद्दा दर्ता भएका छन्। कुल ७ उजुरी मध्धे पुराना २ र चालु आर्थिक वर्षको ७ महिनाको अवधिमा मात्रै ५ वटा उजुरी दर्ता भएका छन्।

डाेल्पाेबुद्द र काइके गाउँपालिकाकाे हकमा पहिलेका वर्षमा शुन्य उजुरी रहेकाेमा  चालु आर्थिक वर्षको ७ महिनाको अवधिमा मात्रै समान २-२ वटा उजुरी दर्ता भएका छन्। अनुसन्धानकै क्रममा रहेकाे अख्तियारले जनाएकाे छ।

मुद्दा दर्ताकाे संख्या हेर्दा डाेल्पाका स्थानीयतहहरूमा भ्रष्ट्राचार उत्कर्षमा छ भन्नेमा दुइमत छैन। तल्लाे डाेल्पामा पर्ने स्थानीयतहहरूबाट मात्रै उजुरी पहिले देखि नै धेरै पर्ने गरेकाेमा हाल उपल्लाे भेगमा पर्ने स्थानीयतहहरूबाट धेरै मुद्दा पर्ने गरेका तथ्य सार्वजनिक भएकाे छ। उपल्लाे भेगमा जनप्रतिनिधि र कर्मचारीकाे मिलेमताेमा लुटतन्त्रकाे साम्राज्य नै खडा गरेकाे तथ्यहरू सार्वजनिक हुन थालेका छन्। कति ले त अख्तियारलाइ नै अटेरी गरेकाे स्राेतले जनाएकाे छ।  इमान्दार खवरले पनि अव विशेष याेजनामा देखादेखि भएकाे भ्रष्ट्राचारकाे तथ्य सार्वजनिक गर्ने छ। अख्तियारले कति मुद्दामा भ्रष्ट्राचार भएकाे पुष्टि गर्दै विषेश  अदालतमा समेत मुद्दा दर्ता गरेकाे छ भने अनुसन्धानलाइ तिव्रता दिइएकाे जनाएकाे छ।