ललितपुरको गोदावरी नगरपालिका मेयर गजेन्द्र महर्जनसहित १४ जनाविरुद्ध भ्रष्टाचार मुद्दा दायर भएको छ। अख्तियारले भ्रष्टाचार मुद्दा दायर गरेसँगै मेयर महर्जन निलम्बन हुने भएका छन्।
अख्तियार दुरुपयोग अनुसन्धान आयोगले विशेष अदालतमा सोमबार उनीहरूविरुद्ध एक अर्बभन्दा बढी बिगो माग दाबीसहित मुद्दा दायर गरेको हो। फरक–फरक शीर्षकमा पाँच वटा मुद्दा दर्ता भएको अख्तियारले उल्लेख गरेको छ।
नदीजन्य पदार्थ सरकारी दररेटभन्दा कम कायम गरी ठेक्का दिएर राजश्व हिनामिना गरी भ्रष्टाचार गरेको अख्तियारको अभियोग पत्रमा दाबी गरिएको छ।
राजश्व हिनामिनामा बिगो र बिगोको दोब्बर जरिवाना तथा भ्रष्टाचार निवारण ऐन अनुसार कैद पनि गर्न माग गरिएको छ। लेले र नल्लुका ढुंगाखानीबाट रोडाढुंगा उत्खनन गर्दा भ्रष्टाचार भएको अख्तियारको दाबी छ।
