काठमाडाैँ, दुई खेलाडीले अर्धशतक बनाएपछि नेपालले आइसिसी टी–२० विश्वकप छनोटको अन्तिम खेलमा सामोआलाई २१२ रनको लक्ष्य दिएको छ ।
शुक्रबार ओमानको अल अमेरात क्रिकेट मैदानमा टस हारेर पहिले ब्याटिङ गरेको नेपालले निर्धारित २० ओभरमा ४ विकेट गुमाउँदै २११ रन बनाएको हो।
नेपालका ओपनर आसिफ शेखले सर्वाधिक ६९ रन बनाए। उनले ४१ बलमा ७ चौका र ४ छक्का प्रहार गरेका हुन्। तेस्रो नम्बरमा आएका दीपेन्द्र सिंह ऐरीले ३३ बलमा ५३ रन बनाए। यो प्रतियोगितामा पहिलो पटक तेस्रो क्रममा आएका दीपेन्द्रले २ छक्का र ४ चौका हिर्काएका हुन्।
यसबाहेक कुशल भुर्तेलले १७, कप्तान रोहितले २१ तथा लोकेश बमले ३९ रन बनाए।
प्रशिक्षक स्टुआर्ट लले अन्तिम खेलमा सोमपाल कामी, कुशल मल्ल र आदिल आलमलाई विश्राम दिँदै करण केसी, आरिफ शेख र ललित राजवंशीलाई मौका दिएका छन्।
नेपाल लगातार खेल जित्नै विश्वकपमा छनोट भइसकेको छ। नेपाल सामोआलाई हराउँदै विश्वकप छनोटको एसिया तथा इष्ट एसिया प्यासिफिकको च्याम्पियन बन्ने योजनामा छ।यो प्रतियोगिताबाट नेपालसहित युएई र ओमान विश्वकपमा पुगिसकेका छन्।
