डोल्पा — हिमाली जिल्ला डोल्पाको उत्तरी क्षेत्रमा पर्ने उपल्लो डोल्पाका ३० प्रतिशत मतदाता आफ्नो थातथलो भन्दा बाहिर रहेको पाइएको छ । फागुन २१ तोकिएको प्रतिनिधिसभा निर्वाचन नजिकिँदै गर्दा उपल्लो डोल्पाका तीन पालिकाका ३० प्रतिशत मतदाता आफ्नो थातथलो भन्दा बाहिर रहेको पाइएको हो । जिल्ला निर्वाचन अधिकारी दिलकृष्ण श्रेष्ठले उपल्लो डोल्पामा पर्ने डोल्पोबुद्ध, छार्काताङ्सोङ् र शे–फोक्सुण्डो गाउँपालिकाका १३ सय भन्दा धेरै मतदाता बाहिर रहेको सर्वेक्षणले देखाएको हो। यो संख्या त्यहाँ रहेका सबै मतदाताको ३० प्रतिशत हो।
‘उपल्लो डोल्पाका जनप्रतिनिधिहरुले धेरै मतदाता बाहिर भएको र हिमपातका कारण बाटो बन्द भएकाले फर्कन नसक्ने भनेर लिखित र मौखिक रुपमै जानकारी गराउनुभएको थियो । त्यही अनुसार पालिकाकै सम्पर्क व्यक्ति तोकेर कति मतदाता बाहिर छन् भनेर सर्वेक्षण समेत गर्न लगाइएको थियो । सोही सर्वेक्षण अनुसार ३० प्रतिशत मतदाता बाहिर भएको देखियो,’ श्रेष्ठले भने ।
शे–फोक्सुण्डो गाउँपालिकाका उपाध्यक्ष पेमा वाङ्छेन गुरुङले सरकारले हिउँदमा आफ्नो थातथलो छोडेका मतदातालाई फर्काउन पहल नगरे धेरै जना मतदान गर्नबाट छुट्न सक्ने भन्दै चिन्ता व्यक्त गरे । ‘तीन पालिकाका ३० प्रतिशत भन्दा धेरै मतदाता गाउँमा छैनन् । कोही चिसो कटाउन तल्लो डोल्पा झरेका छन् । कोही विभिन्न काम विशेषले नेपालगञ्ज,काठमाडौंलगायतका सहरबजार पुगेका छन्,’ गुरुङले भने, ‘चुनावमै पुग्नेगरी फर्कौं भन्दा पनि पटक–पटक भएको हिमपातले गाउँ फर्कँने बाटाघाटा सबै बन्द भएकाले जान सक्ने अवस्था छैन् । मतदाताहरु भने आफ्नो मत हाल्न नपाइने भइयो भन्दै जनप्रतिनधिहरुसँग गुनासो गरिरहेका छन् । यस्तो अवस्थामा मतदातालाई कसरी लैजान सकिन्छ सरकारले समयमै सोच्नुपर्छ ।’
उपल्लो डोल्पाका जनप्रतिनिधिहरुले सरकारलाई हिमाली क्षेत्रको निर्वाचन सारिदिन समेत आग्रह गरेका छन् । निर्वाचन एकै पटक गर्ने भए आवश्यक सामग्री र कर्मचारीमात्र होइन मतदाता समेत हेलिकप्टर मार्फत पु¥याइदिनु पर्ने उनीहरुको धारणा छ । यता प्रमुख जिल्ला अधिकारी जुनु ढकालले यस विषयमा निर्वाचन आयोगलगायतका निकायसँग समन्वय भइरहेको बताइन् । ‘७० प्रतिशत मतदाता उपल्लो डोल्पामै छन् । ३० प्रतिशत नभएको प्रारम्भिक तथ्यांक आएको छ,’ उनले भनिन् । जिल्लाबाहिर गएका मतदाता फर्कँन नसक्नुमा हिमपातको कारण सृजित भौगोलिक कठिनाइ नै भएको उनले बताइन् ।
जिल्लास्थित सुरक्षा संयन्त्रद्वारा तल्लो डोल्पाका २९ वटा मतदान केन्द्रको स्थलगत अनुगमन गरिएको र खासै चुनौती नदेखिएको समेत उनले जानकारी दिइन् । उपल्लो डोल्पाका ३ पालिकामा कुल ४ हजार ३ सय ६६ मतदाता रहेका छन् । त्यसमा १५ सय भन्दा धेरै मतदाता जिल्ला बाहिर रहेको सर्भेक्षणबाट देखिएको हो। सर्वेक्षणबाट प्राप्त तथ्यांक भन्दा पनि अझै धेरै मतदाता बाहिर रहेको उपल्लो डोल्पाका जनप्रतिनिधिहरुको दाबी छ। कान्तिपुरमा खवर छ।
